रत्नपार्क–सूर्यविनायक मेट्रो रेलको पूर्वसम्भाव्यता अध्ययन जाइकालाई

काठमाडौंको रत्नपार्कदेखि भक्तपुरको सूर्यविनायकसम्म मेट्रो रेल चलाउने योजनाको पूर्वसम्भाव्यता अध्ययनको जिम्मा जापान अन्तर्राष्ट्रिय सहयोग नियोग, जाइकालाई दिइएको छ। सरकारको विशेष अनुरोधमा जाइका आफ्नै खर्चमा अध्ययन गर्न तयार भएको छ र ६ महिनाभित्र प्रतिवेदन बुझाउने समयसीमा तोकेको छ। पूर्वाधार विकास मन्त्रालयका सहसचिव शुशिलबाबु ढकालका अनुसार अध्ययनमा रेलमार्गका प्राविधिक, आर्थिक, सामाजिक र वातावरणीय पक्ष केलाइनेछ।

बनाउनुपर्ने संरचना र रेल सञ्चालनको सम्भावनाबारे पनि विश्लेषण हुनेछ। सहसचिव ढकाल विकास सहायता समन्वय तथा गुणस्तर महाशाखाका प्रमुख पनि हुनुहुन्छ। आयोजना कार्यान्वयन गर्ने कि नगर्ने र कुन ढाँचामा अघि बढाउने भन्ने निर्णय प्रतिवेदन आएपछि मात्र हुने उहाँले बताउनुभएको छ।

यो अध्ययन उपत्यकाको बढ्दो जनसङ्ख्या, अव्यवस्थित सार्वजनिक यातायात र सवारी चापको समस्यासँग जोडिएको छ।