बुढीगण्डकी बाढीपछि शान्तिबजारका परिवार त्रिपालमुनि, धार्चेको सम्पर्क टुट्यो

गोरखामा असोज २५ गते बुढीगण्डकी नदीमा आएको बाढीले आरुघाट गाउँपालिका–५ को शान्तिबजार बस्ती उजाड बनाएको छ। स्थानीय राजकुमार खत्रीका अनुसार बस्तीका करिब ५८ घरधुरीमध्ये कुनै पनि घर बस्न मिल्ने अवस्थामा छैनन्। बाढीले घरसँगै खाद्यान्न, लत्ताकपडा, बिजुलीका उपकरण, पशुपन्छी र खेतीयोग्य जमिनमा पनि क्षति पुर्‍याएको छ।

धान, कुखुरा, टेलिभिजन र फ्रिजसमेत नष्ट भएका र घरबाट जस्तापाता मात्र निकाल्न सकिने अवस्था रहेको खत्रीले बताउनुभएको छ। पहिले बस्तीको पारिपट्टि बग्ने नदी अहिले घरआँगनबाटै बगिरहेको उहाँको भनाइ छ। घरबास गुमाएका परिवार अहिले त्रिपालमुनि बसिरहेका छन् र उनीहरूलाई तत्काल बसोबासको प्रबन्ध चाहिएको स्थानीयले बताएका छन्।

उही बाढीले धार्चे गाउँपालिका–२ का केरौँजा र रुन्चेत क्षेत्र जोड्ने मुख्य झोलुंगे पुल बगाएपछि त्यहाँको आवागमन प्रभावित भएको छ। खोर्लाबेंसीको अर्को पुलसमेत बगेकाले स्थानीय माथिल्लो भागको लुचेकको पुल हुँदै असहज पैदल बाटो प्रयोग गर्न बाध्य छन्। दैनिक उपभोग्य वस्तु ढुवानीमा समस्या परेको छ भने राहत सामग्री ड्रोनमार्फत पुर्‍याइएको छ।

पुल बगेको झन्डै १५ दिन बित्दा पनि पुनर्निर्माण नभएकाले स्थानीयले सरकारसँग छिटो पुल बनाइदिन माग गरेका छन्।