कांग्रेसका स्थानीय तहका उम्मेदवार डिजिटल मतदानबाट, प्रारम्भिक सूची पुस–माघभित्र

नेपाली कांग्रेसले आगामी स्थानीय तह निर्वाचनका उम्मेदवारको प्रारम्भिक सूची पार्टी सदस्यको डिजिटल मतदानबाट पुस–माघभित्र तयार गर्ने भएको छ। सभापति गगनकुमार थापाले सोमबार स्याङ्जाको पुतलीबजारमा आयोजित स्वागत तथा भेटघाट कार्यक्रममा यो जानकारी दिनुभएको हो। चुनावको अन्तिम घडीमा पहुँचका भरमा टिकट दिने वा खोस्ने पुरानो अभ्यास अब अन्त्य हुने उहाँले बताउनुभएको छ।

तल्लो तहका सदस्यले छानेको प्रारम्भिक सूचीमाथि विभिन्न तहमा छलफल गरेपछि मात्र अन्तिम उम्मेदवार तय गरिनेछ। सभापति थापाका अनुसार निर्वाचनभन्दा दुई–तीन महिनाअघि नै उम्मेदवार टुंगो लगाइनेछ। डिजिटल मतदानको व्यवस्था पार्टी विधानमै समेटिएको र क्रियाशील सदस्यता अद्यावधिक गर्ने काम एक महिनाभित्र सकिने उहाँको भनाइ छ।

कांग्रेसले मत होइन, जनताको भरोसा गुमाएको भन्दै उहाँले नेता–कार्यकर्तालाई टाढिएका मतदाताको घरदैलोमा पुगेर गुनासो सुन्न आग्रह गर्नुभएको छ। पार्टीले मंसिरलाई जागरण तथा संगठन सुदृढीकरणको महिना बनाउने र पुस–माघमा चुनावकेन्द्रित गतिविधि चलाउने योजना बनाएको छ। आन्तरिक प्रतिस्पर्धामा हारेका वा जिम्मेवारी नपाएका नेता–कार्यकर्तालाई पनि क्षमताअनुसार भूमिका दिइने सभापति थापाले बताउनुभएको छ।