कांग्रेसलाई एकजुट बनाउन उदयशमशेर राणाको आग्रह

नेपाली कांग्रेसका महामन्त्री उदय शमशेर राणाले पार्टीलाई एकताबद्ध बनाउन सबैलाई एकजुट हुन आग्रह गर्नुभएको छ। नेपाली कांग्रेसको १५औँ महाधिवेशन सम्पन्न भएपछि नवनिर्वाचित सभापति गगनकुमार थापाले शपथ लिई पदभार सम्हालेसँगै महामन्त्री राणाले उहाँलाई पुनः बधाई दिनुभएको छ। बधाईसँगै राणाले सभापति थापालाई सफल कार्यकालको शुभकामना पनि दिनुभएको छ।

कांग्रेसलाई एक ढिक्का बनाउनु आजको मुख्य आवश्यकता भएको उहाँको धारणा छ। महामन्त्री राणाका अनुसार पार्टीभित्र चलिरहेको रूपान्तरण अभियानलाई अर्थपूर्ण नतिजासम्म पुर्‍याउनु सबैको संयुक्त जिम्मेवारी हो। कांग्रेसलाई जनताले विश्वास गर्ने सशक्त राजनीतिक शक्तिका रूपमा उभ्याउनु पनि त्यही जिम्मेवारीभित्र पर्ने उहाँले बताउनुभएको छ।

महामन्त्रीको भूमिकामा रहेर उक्त अभियान सफल पार्न आफू पूर्ण रूपमा प्रतिबद्ध रहेको राणाले उल्लेख गर्नुभएको छ। वर्तमान परिस्थितिमा आपसी भरोसा, सहकार्य र एकताका आधारमा अघि बढ्नुपर्ने उहाँको जोड छ। पार्टीको हित, नागरिकको अपेक्षा र मुलुकको भविष्यलाई प्राथमिकतामा राखेर सबै एकजुट हुनुपर्ने राणाले बताउनुभएको छ।

कांग्रेसलाई बलियो बनाउन सबैको सामूहिक प्रयास अपरिहार्य रहेको पनि उहाँको भनाइ छ।