आमा र नवजात शिशुको अधिकारका लागि मातृशिशुमैत्री निर्देशिका जारी

स्वास्थ्य तथा खाद्य स्वच्छता मन्त्रालयले आमा र नवजात शिशुको अधिकार सुनिश्चित गर्न तथा स्तनपानको संरक्षण र प्रवर्द्धनका लागि नयाँ निर्देशिका जारी गरेको छ। 'मातृशिशुमैत्री स्वास्थ्य संस्था कार्यक्रम सञ्चालन निर्देशिका, २०८३' २०७३ सालको पुरानो अभियान निर्देशिकामा नयाँ व्यवस्था थपेर ल्याइएको मन्त्रालयले जनाएको छ। नयाँ व्यवस्थाअनुसार स्वास्थ्य संस्थाले सुत्केरी आमा र नवजात शिशुका लागि छुट्टाछुट्टै अनिवार्य मापदण्ड पालना गर्नुपर्नेछ।

प्रसवका बेला आमाले रोजेको परिवारको सदस्यलाई साथमा बस्न दिनुपर्नेछ। जन्मलगत्तै शिशुलाई आमासँगै उही शय्यामा राख्नुपर्ने र स्तनपान चाँडो सुरु गराउनुपर्ने प्रावधानलाई प्राथमिकता दिइएको छ। प्रसूति कक्षमा पर्दा वा छेकबार राखेर हरेक आमाको गोपनीयता र मर्यादा जोगाउनुपर्ने व्यवस्था पनि छ।

एउटै कोठामा एकभन्दा बढी सुत्केरी राखिएको अवस्थामा पनि प्रत्येकको गोपनीयता कायम गर्नुपर्नेछ। अस्पताल र स्वास्थ्य संस्थामा आमा र शिशुको अधिकार तथा आवश्यकताअनुसार सेवा दिनु निर्देशिकाको मुख्य उद्देश्य हो।