चितवन राष्ट्रिय निकुञ्जमा अनलाइन टिकट सेवा सुरु

चितवन राष्ट्रिय निकुञ्जले झन्डै तीन वर्षको तयारीपछि बिहीबारदेखि अनलाइन टिकट सेवा सुरु गरेको छ। निकुञ्जले यो सेवा परीक्षणका रूपमा सौराहा प्रवेश नाकाबाट थालेको प्रमुख वरिष्ठ संरक्षण अधिकृत डिलबहादुर पुर्जा पुनले बताउनुभएको छ। अब पर्यटकले विवरण भरेर शुल्क अनलाइनबाट तिर्न र क्यूआर कोड देखाएर निकुञ्जभित्र जान सक्नेछन्।

यसअघि टिकट लिन आफैँ उपस्थित भई नगद बुझाउनुपर्दा पर्यटक, होटल र पर्यटन व्यवसायीलाई असुविधा हुँदै आएको थियो। निकुञ्जका १२ प्रवेश नाकामध्ये ८० प्रतिशतभन्दा बढी स्वदेशी तथा विदेशी पर्यटक सौराहाबाटै भित्रिने भएकाले पहिलो चरणमा त्यहीँ सेवा राखिएको पुर्जा पुनले बताउनुभएको छ। चितवन राष्ट्रिय निकुञ्ज वन्यजन्तु अवलोकनका लागि नेपालका सबैभन्दा लोकप्रिय गन्तव्यमध्ये एक हो।