सरदर मितिभन्दा ढिलो गरी मनसुन नेपालबाट पूर्ण रूपमा बाहिरियो

यस वर्षको मनसुन नेपालको सबै भूभागबाट पूर्ण रूपमा बाहिरिएको छ। जल तथा मौसम विज्ञान विभागको मौसम पूर्वानुमान महाशाखाले बुधबार असोज २८ गते बुलेटिन जारी गर्दै यस्तो जानकारी दिएको छ। नेपालबाट मनसुन बाहिरिने सरदर मिति असोज १६ अर्थात् अक्टोबर २ हो, तर यस वर्ष १२ दिन ढिलो भएको छ।

महाशाखाका अनुसार असोज १७ गते सुदूरपश्चिम, कर्णाली, लुम्बिनीको पश्चिमी भाग र गण्डकीको पश्चिमी भागका केही स्थानबाट बहिर्गमन सुरु भएको थियो। यस वर्ष मनसुन सामान्य मिति जुन १३ भन्दा ढिलो असार ५ गते भित्रिएको थियो। मनसुन अवधिमा समग्रमा सरदर वर्षा भए पनि तराई र पहाडभन्दा हिमाली क्षेत्रमा बढी पानी परेको छ।

विभागका अनुसार आज हिमाली र पहाडी भागमा आंशिक बादल लाग्ने र तराईमा मौसम मुख्यतया सफा रहनेछ। बागमती, गण्डकी, लुम्बिनी र कर्णालीका पहाडी भूभागका एक–दुई ठाउँमा मेघ गर्जनसहित हल्का वर्षा हुन सक्छ। काठमाडौँको तापक्रम २६ डिग्री सेल्सियस र विराटनगर तथा जनकपुरको ३३ डिग्री सेल्सियस रहने पूर्वानुमान छ।

भोलि भने पहाडी र तराई भूभागमा मौसम मुख्यतया सफा रहने अनुमान छ। मनसुन बाहिरिए पनि स्थानीय र पश्चिमी वायुको प्रभाव रहन सक्ने भएकाले महाशाखाले ताजा मौसम सूचनामा ध्यान दिन आग्रह गरेको छ।