सरकारी अस्पतालका कर्मचारीलाई स्वास्थ्य बीमामा आबद्ध गराउन मन्त्रालयको पत्र

स्वास्थ्य तथा खाद्य स्वच्छता मन्त्रालयले सरकारी निकायमा कार्यरत राष्ट्रसेवक कर्मचारीलाई स्वास्थ्य बीमा कार्यक्रममा आबद्ध गराउन पत्राचार गरेको छ। मन्त्रालयले विभाग, सरकारी अस्पताल, स्वास्थ्य विज्ञान प्रतिष्ठान र अन्य सङ्घीय निकायलाई आफ्ना कर्मचारीलाई बीमामा समेट्न आवश्यक पहल गर्न भनेको छ। भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयलाई पनि छुट्टै पत्र पठाइएको छ।

सो पत्रमा नेपाल सरकारका मन्त्रालय, सचिवालय र आयोगदेखि प्रदेश तथा स्थानीय तहसम्मका कर्मचारीलाई कार्यक्रममा जोड्न पत्राचार, समन्वय र सहजीकरणमा सघाउन अनुरोध गरिएको छ। स्वास्थ्य बीमा ऐन र नियमावलीमा भएको व्यवस्थाअनुसार कर्मचारीलाई आबद्ध गराउन मन्त्रालयले सम्बन्धित निकायसँग समन्वयको अनुरोध गरेको हो। सरकारी सेवामा रहेका कर्मचारीमा बीमाको पहुँच विस्तार गर्दै कार्यक्रमलाई थप व्यवस्थित बनाउने उद्देश्यले यो पहल गरिएको मन्त्रालयले जनाएको छ।