दसैँभर काभ्रेमा टिपर सञ्चालनमा रोक

नेपालीको महान् चाड बडादसैँका अवसरमा काभ्रेपलाञ्चोक जिल्लाभर असोज ३१ देखि कात्तिक ९ गतेसम्म टिपर चलाउन रोक लगाइएको छ। अङ्ग्रेजी मितिअनुसार यो रोक अक्टोबर १७ देखि २६ सम्म लागू हुनेछ। जिल्ला प्रशासन कार्यालय काभ्रेले सूचना जारी गरी फूलपातीदेखि पूर्णिमासम्म जिल्लाभित्र टिपर सञ्चालनमा पूर्ण रोक रहने जनाएको छ।

असोज २७ गते बसेको जिल्ला सुरक्षा समितिको बैठकले जिल्लाभित्र टिपर नचलाउन र नचलाउन लगाउन अनुरोध गर्ने निर्णय गरेको हो। सहायक प्रमुख जिल्ला अधिकारी तथा सूचना अधिकारी महेन्द्र विश्वकर्माले बैठकको निर्णयबारे जानकारी दिनुभएको छ। दसैँको अवधिमा बिपी राजमार्ग र अरनिको राजमार्गलगायत जिल्लाका प्रमुख सडकमा सवारीसाधनको चाप बढ्ने भएकाले यो कदम चालिएको उहाँले बताउनुभएको छ।

सम्भावित दुर्घटनाको जोखिम घटाउने र यात्रुवाहक गाडीको आवतजावत सहज तथा सुरक्षित बनाउने उद्देश्यले रोक लगाइएको उहाँको भनाइ छ। प्रशासनले तोकिएको अवधिभर सम्बन्धित सबै पक्षलाई टिपर सञ्चालन नगर्न आग्रह गरेको छ।