पोखरा–दुबई उडानको एक महिना: ६ हजारभन्दा बढी यात्रु

पोखरा–दुबई रुटमा फ्लाई दुबईले नियमित उडान सुरु गरेको एक महिनामा करिब ६ हजार ४०० यात्रुले सेवा लिएका छन्। कम्पनीले असोज ७ गतेदेखि पोखरा अन्तर्राष्ट्रिय विमानस्थलबाट यो उडान थालेको थियो। विमानस्थल नागरिक उड्डयन कार्यालयका महाप्रबन्धक जगन्नाथ निरौलाका अनुसार महिनाभरमा करिब ३० उडान भएका छन्।

दुबईबाट आउने करिब ४ हजार ५०० र पोखराबाट जाने करिब १ हजार ८०० यात्रु रहेको उहाँले जानकारी दिनुभएको छ। यसरी पोखराबाट जानेको सङ्ख्या दुबईबाट आउनेको आधाभन्दा कम देखिएको छ। दसैँ र तिहारका कारण दुवैतर्फ यात्रु बढिरहेको र सुरुको महिना उत्साहजनक रहेको महाप्रबन्धक निरौलाले बताउनुभएको छ।

सरकारी र निजी क्षेत्र मिलेर प्रवर्द्धन गरे यो उडान नियमित र दीर्घकालीन बन्न सक्ने उहाँको विश्वास छ। पोखरा महानगरपालिकाका प्रमुख धनराज आचार्यले पोखराबाट दुबई जाने यात्रु बढाउनुपर्नेमा जोड दिनुभएको छ। उडानलाई निरन्तरता दिन सन् २०२७ को अक्टोबरसम्मका लागि टिकट बुकिङ खुला गरिएको प्रमुख आचार्यले जानकारी दिनुभएको छ।