अस्ट्रियाद्वारा चार रुसी कूटनीतिज्ञ निष्कासित

कूटनीतिक हैसियतसँग नमिल्ने गतिविधि गरेको आरोपमा अस्ट्रियाले चार रूसी कूटनीतिज्ञलाई देश छाड्न निर्देशन दिएको छ। अस्ट्रियाको विदेश मन्त्रालयले शुक्रबार यो निर्णय सार्वजनिक गरेको हो। सुरक्षा अधिकारीहरूले दिएको सूचनाका आधारमा भियनामा रहेका ती कूटनीतिज्ञमाथि कारबाही गरिएको मन्त्रालयले जनाएको छ।

निष्कासितमध्ये तीन जना रूसी दूतावासमा र एक जना युरोपमा सुरक्षा तथा सहयोग सङ्गठन, अर्थात् ओएससीईका लागि रूसी प्रतिनिधिमण्डलमा कार्यरत थिए। रूसी दूतावासले निर्णयको आलोचना गर्दै उचित प्रत्युत्तर दिने चेतावनी दिएको छ। रुसले अस्ट्रियामाथि रुसविरोधी पश्चिमी नीति आँखा चिम्लेर पछ्याएको आरोप पनि लगाएको छ।

सन् २०२२ देखि अस्ट्रियाले यसअघि पनि धेरै पटक रूसी कूटनीतिज्ञ निकाल्दै आएको छ।