बिजुली ट्रिपिङबाट बच्न उद्योगहरूमा छतमा सोलार जडान बढ्दै

बारम्बार हुने बिजुली ट्रिपिङ र महँगो जेनेरेटर खर्चको विकल्प खोज्दै नेपाली उद्योगहरूले आफ्नै छत र खाली जग्गामा सोलार प्यानल जडान गर्न थालेका छन्। मोरङ–सुनसरी, वीरगन्ज–पथलैया, भैरहवा तथा रूपन्देही क्षेत्रका सिमेन्ट, छड, प्लास्टिक, कपडा र खाद्यान्न उद्योगमा यो क्रम बढेको छ। उत्पादन क्षमता बढे पनि बिजुली आपूर्तिको गुणस्तर र भरपर्दोपनमा समस्या रहेकाले उद्योगहरूले सोलारलाई लागत घटाउने र काम निरन्तर राख्ने उपायका रूपमा लिन थालेका हुन्।

जलविद्युत्को जडित क्षमता करिब ४ हजार ३०० मेगावाट नाघे पनि उद्योगीहरू भरपर्दो आपूर्तिका लागि सोलारतर्फ आकर्षित भएका छन्। घाम पावरका प्रमुख कार्यकारी अधिकृत अञ्जल निरौलाका अनुसार आपूर्ति भरपर्दो नहुनु र बारम्बार ट्रिपिङ हुनु नै सोलारप्रतिको आकर्षण बढ्नुको मुख्य कारण हो।