दसैँपछि धान र वर्षे बाली भित्र्याउन किसानलाई चटारो

दसैँ सकिँदै गर्दा जुम्लादेखि रूपन्देही र दाङसम्मका किसान खेतमा पाकेको धान र अन्य वर्षे बाली भित्र्याउन व्यस्त भएका छन्। जुम्लामा मौसम खुलेपछि किसान धान, कोदो, फापर, सिमी र मकै थन्क्याउन बिहानदेखि साँझसम्म खटिएका छन्। तिला गाउँपालिका–८ का वडाध्यक्ष आसे बस्नेतका अनुसार किसानले चाडभन्दा बाली स्याहारलाई प्राथमिकता दिएका छन्।

जुम्ला कृषि विकास कार्यालयका प्रमुख रामभक्त अधिकारीका अनुसार भटमास र आलु थन्क्याउने काम पनि यतिबेलै परेको छ। रूपन्देहीमा कतिपय किसानले दसैँअघि नै धान काटिसकेका छन् भने बाँकी काट्ने तयारीमा छन्। तिलोत्तमा नगरपालिका–४ विष्णुपुर क्षेत्रमा पनि किसान धान भित्र्याउन व्यस्त देखिन्छन्।

दाङको दंगीशरण गाउँपालिका–३ हेकुलीका किसान धान काटेर खल्यानसम्म ओसार्दै थ्रेसरमार्फत घर भित्र्याउन जुटेका छन्। हेकुलीका भरत चौधरीका अनुसार उनीहरू वर्षभरि खाने धान राखेर बाँकी बेचेर घरखर्च चलाउँछन्। पर्वतको फलेवास नगरपालिका–२ भेडाबारीमा धान र कोदो पहेँलिँदै गरेकाले केही दिनमै भित्र्याउने काम सुरु हुनेछ।