धितोबिना मोबाइलबाटै बैंक ऋण: कसले कति पाउँछन्

मोबाइल एपबाटै बिना धितो बैंक ऋण दिने ‘फोन लोन’ सेवा विस्तार हुँदै गएको छ। बैंकहरूका अनुसार अहिले ११ वटा वाणिज्य बैंकले यो सेवा दिइरहेका छन्, जसबाट योग्य ग्राहकले बढीमा २ लाख रुपैयाँसम्म कर्जा पाउन सक्छन्। सेवा दिने बैंकमा राष्ट्रिय वाणिज्य, कृषि विकास, नबिल, एभरेष्ट, प्रभु, कुमारी, एनएमबि, सिटिजन्स, एनआईसी एसिया, माछापुच्छ्रे र लक्ष्मी सनराइज बैंक छन्।

ग्राहकले बैंकको एपमा लगइन गरेर कर्जा विकल्पबाट आवेदन दिनुपर्छ, छुट्टै कागजपत्र बुझाउनुपर्दैन। तर आवेदन दिने सबैले ऋण पाउने निश्चित छैन। बैंक अधिकारीहरूका अनुसार प्रणालीले पछिल्लो ६ महिनाको खाता कारोबार केलाएर कर्जाको सीमा आफैँ तय गर्छ, त्यसैले कर्मचारीले रकम निर्धारण गर्दैनन्।

कारोबारअनुसार ५ सय रुपैयाँदेखि २ लाख रुपैयाँसम्म ऋण पाउन सकिन्छ। धेरैजसो बैंकले एक वर्षभित्र ऋण चुक्ता गर्नुपर्ने सर्त राखेका छन्, एनएमबि बैंकले भने २ वर्षसम्मको समय दिएको छ। कृषि विकास बैंकले यसै साता सेवा सुरु गर्दै पहिलो चरणमा तलबी खातावाललाई लक्षित गरेको छ।

बैंकका कर्जा व्यवसाय तथा ट्रेजरी विभाग प्रमुख सुदीप दाहालले बैंकमा करिब २० लाख तलबी खाता रहेको बताउनुभएको छ, जसमा स्थानीय तहका कर्मचारी र शिक्षक पनि छन्। केही अन्य बैंकले पनि यो सेवा थाल्ने तयारी गरेका छन्।