खाडीमा तनाव: तेल र एआई केन्द्रमा आक्रमणको इरानी चेतावनी, इस्तानबुलमा विदेशमन्त्री बैठक, साउदी उडान रद्द

अमेरिका र इजरायलले फेरि आक्रमण गरेमा खाडी क्षेत्रका डेटा सेन्टर, कृत्रिम बुद्धिमत्ताका पूर्वाधार, समुद्रमुनिका सञ्चार केबल र तेल प्रशोधन केन्द्रमा हमला गर्ने चेतावनी इरानले दिएको छ। द गार्डियनका अनुसार इरानको सर्वोच्च राष्ट्रिय सुरक्षा परिषद्का सचिव मोहसेन रेजाईले यस्तो चेतावनी दिनुभएको हो। हर्मुज जलमार्गमा ७ वटा तेल ट्याङ्करमा आक्रमण भई क्षति पुगेको दाबी इरानले गरेको छ।

अलजजीराका अनुसार फेब्रुअरी २८ मा युद्ध सुरु भएयता त्यस जलमार्गमा एकै दिनमा भएको यो सबैभन्दा ठूलो क्षति हो। अमेरिकाले ट्याङ्करलाई जलमार्गको अर्को भागबाट लैजान सघाए मध्यपूर्वका अमेरिकी आधारमा आक्रमण गर्न सकिने चेतावनी आईआरजीसीले पनि दिएको छ। यही तनावबीच बेलायत, फ्रान्स र जर्मनी तथा टर्की, साउदी अरब, पाकिस्तान र इजिप्टका विदेशमन्त्रीहरू शुक्रबार इस्तानबुलमा भेला भएका छन्।

बैठकमा हर्मुजको सुरक्षा, यमन र प्यालेस्टाइनको अवस्थाबारे छलफल हुनेछ। अमेरिकाले साउदी अरबमा कार्यरत केही कूटनीतिज्ञ र सरकारी कर्मचारीका परिवारलाई देश छाड्न आदेश दिएको छ। अमेरिकी विदेश मन्त्रालयका प्रवक्ता टमी पिगोटले कर्मचारीको सुरक्षा सर्वोच्च प्राथमिकता भएको बताउनुभएको छ।

भारतीय वायुसेवा कम्पनी इन्डिगोले रियादका उडान अक्टोबर ३१ सम्म र जेद्दा, दमाम तथा मदिनाका उडान अक्टोबर २७ सम्म रद्द गरेको छ। हिमालय एयरलाइन्सले पनि कात्तिक ८ गते काठमाडौंबाट दमाम जाने र कात्तिक ९ गते फर्कने उडान रद्द गरेको जनाएको छ।