स्विट्जरल्यान्डमा हिमनदी पग्लिँदा बरफमुनिका ऐतिहासिक वस्तु बाहिर

जलवायु परिवर्तनका कारण स्विट्जरल्यान्डका हिमनदी तीव्र रूपमा पग्लँदा बरफमुनि लामो समयदेखि पुरिएका वस्तु बाहिर आउन थालेका छन्। ती वस्तु समेटेर लुसर्नस्थित ग्लेसियर गार्डेनले 'ट्रेजरी अफ आइस' अर्थात् 'बरफको खजाना' नामको प्रदर्शनी सुरु गरेको छ। प्रदर्शनीमा प्राचीन सिकारीको धनुष, रोमनकालीन मूर्ति, पर्वतारोहीको फुटेको हेल्मेट र गाईको खप्पर राखिएका छन्।

मेयोनेजको खाली ट्युब, वाइनको बोतल, जुत्ता, स्विस सेनाको पुरानो चक्कु र स्कीका सामान पनि त्यहाँ छन्। स्विस हिमनदीविद्हरूका अनुसार यस वर्ष देशका हिमनदीको क्षेत्रफल ५.५ प्रतिशतले घटेको छ, जुन अभिलेख सुरु भएयताकै दोस्रो ठूलो गिरावट हो। ग्लेसियर गार्डेनका निर्देशक आन्द्रेयास बुरीले हिमनदी पूर्ण रूपमा हराउनुअघि त्यहाँ जोगिएका अभिलेख जनतालाई देखाउन प्रदर्शनी गरिएको बताउनुभएको छ।

उहाँका अनुसार केही वस्तु मानिसले हराएका वा फ्याँकेका फोहोर पनि हुन सक्छन्। प्रदर्शनीमा बरफमा जमेका परागकण, हरितगृह ग्यास र बीसौँ शताब्दीको मध्यतिरका आणविक परीक्षणबाट निस्किएका रेडियोधर्मी कणबारे पनि जानकारी दिइएको छ। करिब ५०० वर्षअघि खडेरी र असाधारण गर्मीले लागेको डढेलोको धुवाँ र कोइलाका अवशेष पनि बरफमा भेटिएका छन्।

वस्तुहरू पहाडबाट प्रयोगशालासम्म नमुना ढुवानी गर्ने सेता बाकसमाथि सजाइएका छन्। हिमनदीबाट निकालिएको पग्लँदै गरेको बरफको सिलिन्डर र पग्लने दर देखाउने तथ्याङ्क पनि प्रदर्शनीमा छन्।