सन्थाल समुदायको दासाई नृत्यले दसैँ मेलामा रौनक

मोरङको उर्लाबारी–९ मा बुधबार भएको दसैँ मेलामा सन्थाल समुदायले आफ्नो मौलिक दासाई नृत्य प्रस्तुत गरेका छन्। परम्परागत पहिरनमा सजिएका युवाले ढोल र पुराना बाजाको तालमा सामूहिक रूपमा नाचेका थिए भने हेर्नेको भीड लागेको थियो। दसैँ र तिहारमा पुस्तौँदेखि देखाइँदै आएको यो नृत्य सन्थाल समुदायको सांस्कृतिक पहिचानसँग गाँसिएको छ।

पूर्वी नेपालका मोरङ र झापामा बसोबास गर्ने यो समुदायले विभिन्न मेला र पर्वमा दासाई नृत्य देखाउँदै आएको छ। स्थानीय फागुलाल हास्दाका अनुसार दासाई नृत्य हुँदा दसैँ मेलाको रौनक नै बेग्लै हुन्छ। उहाँले यो नृत्यलाई आफ्नो जातीय पहिचान भन्दै पुस्तौँदेखि यसलाई निरन्तरता दिइएको बताउनुभएको छ।

संरक्षण र प्रवर्द्धनमा उचित ध्यान नदिइँदा आफ्नो मौलिक संस्कृति बचाउन कठिन बन्दै गएको समुदायका अगुवाहरू बताउँछन्।