भारतीय स्याउ आयात रोकिँदा जुम्लाको स्याउले करिब ५५ करोड कमायो

भारतबाट स्याउ आउन रोकिएपछि जुम्लाको स्याउले यस वर्ष स्वदेशी बजारमा राम्रो अवसर पाएको छ। कृषि विकास कार्यालय जुम्लाका प्रमुख रामभक्त अधिकारीका अनुसार हालसम्म करिब ७ हजार ३३० मेट्रिक टन स्याउ अन्य जिल्लामा पठाइएको छ। किसानले बगैँचामै प्रतिकिलो कम्तीमा करिब ७५ रुपैयाँका दरले स्याउ बेचेका छन्।

सोही दरका आधारमा जिल्लाबाहिर गएको स्याउबाट करिब ५५ करोड रुपैयाँको कारोबार भएको कार्यालयको प्रारम्भिक हिसाब छ। कार्यालयले यस वर्ष जिल्लामा करिब १९ हजार ५०० मेट्रिक टन स्याउ उत्पादन हुने अनुमान गरेको छ, जुन गत वर्षभन्दा केही कम हो। कुल उत्पादन र जिल्लाबाहिर गएको स्याउको एकिन विवरण अझै सङ्कलन भइरहेको छ।

व्यापारीहरूले केही स्याउ शीतभण्डार र घरमै भण्डारण गरेर राखेका छन्। तातोपानी गाउँपालिका–६ को बाँजारावलामा गरिएको सामूहिक खेतीबाट करिब ३४ मेट्रिक टन स्याउ फलेको थियो, जसबाट झन्डै ३० लाख रुपैयाँको बिक्री भएको छ।