सीमापार विद्युत् व्यापारमा निजी क्षेत्रलाई आशयपत्र दिने तयारी, व्यवसायीको स्वागत

सीमापार बिजुली व्यापारको तयारीका लागि निजी क्षेत्रलाई आशयपत्र दिने योजना सरकारले अघि बढाएको छ। आवश्यक कानुनी र नियामकीय प्रक्रिया पूरा भएपछि मात्र निजी कम्पनीले बिजुली व्यापारको अनुमतिपत्र पाउनेछन्। इप्पान, अर्थात् स्वतन्त्र ऊर्जा उत्पादकहरूको संस्थाका उपाध्यक्ष नरेन्द्र बल्लभ पन्तले निजी क्षेत्रले यो कदमको स्वागत गरेको बताउनुभएको छ।

उहाँका अनुसार अहिलेसम्म बिजुली उत्पादनमा लगानी गर्दै आएको निजी क्षेत्र अब खरिदबिक्रीमा पनि सहभागी हुन चाहन्छ। आशयपत्रले सम्भावित बजार पहिचान गर्न, स्वदेशी र विदेशी साझेदारसँग छलफल गर्न तथा खरिदबिक्री सम्झौताको तयारी गर्न मद्दत गर्ने अपेक्षा छ। पन्तले यो कदम ऊर्जा क्षेत्रको विकासका लागि सकारात्मक भएको र यसले लगानीकर्तालाई नयाँ व्यावसायिक अवसर खोज्न प्रेरित गर्ने बताउनुभएको छ।

नेपालका अधिकांश जलविद्युत् आयोजना नदीको बहावमा आधारित भएकाले बर्खामा पूर्ण क्षमतामा उत्पादन हुन्छ भने हिउँदमा उत्पादन निकै घट्छ। यही कारण नेपालले बर्खामा बढी भएको बिजुली भारतको इन्डियन इनर्जी एक्सचेन्जमार्फत बेच्ने र हिउँदमा अपुग बिजुली त्यहीँबाट किन्ने गरेको छ। सो एक्सचेन्जको डे-अहेड बजारमा बिजुलीको मूल्य एक दिनअघि नै तय हुन्छ।