बूढीगण्डकी बाढीले अवरुद्ध सडक पाँच दिनपछि आंशिक रूपमा खुल्यो

गोरखाको बूढीगण्डकीमा आएको बाढीले अवरुद्ध बनाएको धार्चे गाउँपालिका–२ को बाटो पाँच दिनपछि आंशिक रूपमा खुलेको छ। आइतबारको बाढीले खानीबेँसी, माछाखोला, खोर्लाबेँसी र दोभानका झोलुङ्गे पुल तथा बेलिब्रिज बगाएपछि केरौँजा र रुन्चेतका बासिन्दाको आवतजावत रोकिएको थियो। गाउँपालिका अध्यक्ष लक्ष्मण गुरुङका अनुसार गाउँपालिकाको आह्वानमा करिब ५० जना स्थानीय युवाले मङ्गलबारदेखि लगातार तीन दिन काम गरेर बाटो खोलेका हुन्।

केरौँजा, केरौँजाबेँसी र रुन्चेतका युवाले बाढीले थुपारेको लेदो हटाउने, ठाउँठाउँमा मुढा तेर्स्याउने र भर्‍याङ राख्ने काम गरेका छन्। बाटो खुलेपछि बीचमा रोकिएका करिब १ सय जना भर्‍याङ र डोरीको सहायताले गाउँ पुगेको अध्यक्ष गुरुङले बताउनुभएको छ।