कांग्रेस मतगणना: भण्डारी र पौडेलको अग्रता कायमै, पूरा नतिजा आउन एक हप्ता लाग्ने

नेपाली कांग्रेसको १५औँ महाधिवेशनअन्तर्गत जारी मतगणनामा उपसभापति खुलातर्फ डा. चन्द्रकान्त भण्डारी र महामन्त्री खुलातर्फ प्रदीप पौडेलले अग्रता कायम राखेका छन्। ५ हजार ५०० मत गणना हुँदा पनि दुवैले आफ्नो अग्रता कायमै राखेका थिए। समावेशीतर्फ विनोद चौधरी फेरि पहिलो स्थानमा उक्लिएका छन्।

६ हजार मत गणना हुँदा भण्डारीले ३ हजार १०६ र पौडेलले ३ हजार ४९४ मत ल्याएका छन्। रातोपाटीले यी दुवैको जित निश्चित भएको जनाएको छ।

आइतबार साँझदेखि सहमहामन्त्री खुला, सहमहामन्त्री (महिला) र महिला केन्द्रीय सदस्य खुलाको मतगणना पनि सुरु भएको छ। सभापति, वरिष्ठ उपसभापति र महिला उपसभापति निर्विरोध निर्वाचित भइसकेका छन्। सम्पूर्ण मतपरिणाम आउन एक हप्ता लाग्ने बताइएको छ।

यसैबीच, मधेस प्रदेशको मतपेटिका हराएको भन्ने समाचार भ्रमपूर्ण रहेको निर्वाचन समितिले जनाएको छ।