कांग्रेस सहमहामन्त्री र केन्द्रीय सदस्यको गणना सुरु, सबै परिणाम आउन ५–७ दिन लाग्ने

नेपाली कांग्रेसको १५औँ महाधिवेशनअन्तर्गत सहमहामन्त्री र महिला केन्द्रीय सदस्यको मतगणना सुरु भएको छ। निर्वाचन समितिका अनुसार आइतबार साँझदेखि पार्टी केन्द्रीय कार्यालय सानेपामा ६ स्थानमा गणना भइरहेको छ। खुला सहमहामन्त्रीका दुई पदका लागि नौ जना उम्मेदवार मैदानमा छन्।

महिला सहमहामन्त्रीको एक पदमा नानुमैया बास्तोला र प्रतिमा गौतमबीच प्रतिस्पर्धा छ। खुला महिला केन्द्रीय सदस्यका १५ पदका लागि ३६ जना प्रतिस्पर्धामा छन्। उम्मेदवारका प्रतिनिधि उपस्थित रहेका छन् र गणनास्थलमा कडा सुरक्षा व्यवस्था मिलाइएको छ।

उपसभापति र महामन्त्री पदको मतगणना शनिबारदेखि नै जारी छ। हिमालय टिभीका अनुसार करिब २४ घण्टा लगातार गन्दा पनि खसेको मतको आधा भाग पनि गनिसकिएको छैन। केन्द्रीय निर्वाचन अधिकृत तुलसीराम पराजुलीले सबै मत गनिसक्न करिब पाँचदेखि सात दिन लाग्ने अनुमान गर्नुभएको छ।

उहाँका अनुसार धेरै समूह, उम्मेदवारको ठूलो सङ्ख्या र मतपत्र बढी हुँदा गणना ढिलो भएको हो। उपसभापति र महामन्त्रीको गणना भोलिसम्म टुङ्ग्याउने लक्ष्य रहेको पराजुलीले जानकारी दिनुभएको छ। गति बढाउन अरू गणनास्थल र निर्वाचन अधिकृत थप्ने तयारी पनि भइरहेको छ।