विराटनगरमा असोज २७–२८ मा सातै प्रदेशका मुख्यमन्त्रीको सम्मेलन

कोशी प्रदेश सरकारको आयोजनामा असोज २७ र २८ गते विराटनगरमा सातै प्रदेशका मुख्यमन्त्रीहरूको सम्मेलन हुने भएको छ। कोशीका मुख्यमन्त्री हिक्मतकुमार कार्कीले आइतबार पत्रकार सम्मेलन गरी तयारी पूरा भएको जानकारी दिनुभएको छ। संघीय शासनलाई प्रभावकारी बनाउन र प्रदेशका साझा समस्याको समाधान खोज्न सम्मेलन गर्न लागिएको उहाँले बताउनुभएको छ।

वित्तीय संघीयता, प्राकृतिक स्रोतको बाँडफाँट, अन्तरप्रदेश पूर्वाधार, विपद् व्यवस्थापन र प्रदेशको आर्थिक स्रोत परिचालन मुख्य कार्यसूचीमा छन्। संघीयता कार्यान्वयनका लागि चाहिने कानुन बनाउने, प्रदेशको अधिकार प्रयोग गर्ने र आन्तरिक राजस्व बढाउने विषय पनि साझा एजेन्डामा परेका छन्। प्रदेशले सामना गरिरहेका कानुनी र प्रशासनिक अप्ठ्यारा, आर्थिक अवस्था र विकासमा साझेदारीको सम्भावनामाथि पनि छलफल हुनेछ।

संविधानले दिएका अधिकारको कार्यान्वयन र संघीय सरकारसँगको समन्वय पनि छलफलको विषय हुनेछ। साझा मुद्दा पहिचान गरी कार्ययोजना बनाउँदै प्रदेशबीचको सहकार्यलाई नियमित र नतिजामुखी बनाउने लक्ष्य राखिएको छ। अन्तिम दिन सातै मुख्यमन्त्रीले 'कोशी घोषणा–२०८३' मा हस्ताक्षर गर्ने कार्यक्रम छ।

घोषणापत्रमा प्रदेशका साझा समस्या र विकासका प्राथमिकता समेटिने कोशी सरकारले जनाएको छ।