पुँजी बजार सुधार: धितोपत्र ऐन संशोधन र नेप्से पुनर्संरचनामा सेबोनको जोड

नेपाल धितोपत्र बोर्डले पुँजी बजार सुधारका लागि दुईवटा पूर्ण रूपमा नयाँ ऐनको मस्यौदा तयार पारेर स्वीकृतिका लागि अर्थ मन्त्रालयमा पठाउने तयारी गरेको छ। स्टक ब्रोकर एसोसिएसन अफ नेपालको चाडपर्व शुभकामना कार्यक्रममा बोर्डका अध्यक्ष डा. गोपाल भट्टले यस्तो जानकारी दिनुभएको हो।

उहाँका अनुसार एउटा मस्यौदाले पुँजी बजारका पूर्वाधार, ब्रोकर, मर्चेन्ट बैंकिङ, म्युचुअल फन्ड, सेयर र बन्ड बजार नियमन गर्नेछ। अर्को मस्यौदा राष्ट्र बैंक ऐनको ढाँचामा बोर्डको आफ्नै नियामकीय भूमिका बलियो बनाउने गरी तयार गरिएको छ। बोर्डले नेप्सेको प्रविधि र संस्थागत संरचनामा सुधार तथा मार्जिन लेन्डिङ पूर्ण रूपमा लागू गर्ने विषयलाई प्राथमिकतामा राखेको छ।

एसोसिएसनका अध्यक्ष सागर ढकालले धितोपत्र ऐन संशोधन र नेप्से पुनर्संरचनाको कार्ययोजना छिटो अघि बढाउनुपर्ने बताउनुभएको छ। उहाँले नेप्सेको पुनर्संरचना निजीकरणमा मात्र सीमित नभई प्रविधि भित्र्याउने रणनीतिक साझेदारसहित हुनुपर्ने बताउनुभएको छ। ढकालले अर्थ मन्त्रालय र बोर्डसँग निरन्तर संवाद भइरहेको र नयाँ सरकार बनेपछि बजारमा सकारात्मक संकेत देखिएको उल्लेख गर्नुभएको छ।

नेपाल उद्योग वाणिज्य महासंघको पुँजी बजार समितिका सभापति प्रियराज रेग्मीले ब्रोकरहरूको स्तरीकरण र संस्थागत विकासलाई स्वागतयोग्य भन्नुभएको छ। उहाँले बजार विकासका लागि संस्थागत सुधार र लगानीकर्ताको हित संरक्षण मुख्य प्राथमिकता हुनुपर्ने बताउनुभएको छ।