नाका बन्द हुँदा दसैँ मासु बजारमा मूल्य बढ्ने चिन्ता, पोखरामा च्याङ्ग्रा बिक्री सुरु

बाढीपहिरोले मुख्य राजमार्ग अवरुद्ध हुँदा दसैँ सुरु भइसक्दा पनि काठमाडौँ उपत्यकाको मासु बजार प्रभावित भएको व्यवसायीहरूले बताएका छन्। खसीबोका र च्याङ्ग्रा उपत्यका भित्रिने मुख्य नाकाहरू बन्द भएकाले मासुको मूल्य असामान्य रूपमा बढ्ने चिन्ता बढेको छ। खाद्य व्यवस्था तथा व्यापार कम्पनीले यस वर्ष खसीबोका नल्याउने भएपछि आपूर्ति घटेर मूल्य बढ्ने व्यवसायीहरूको भनाइ छ।

व्यवसायीहरूका अनुसार यस वर्ष कलंकी बजारमा करिब २४ देखि २५ हजार खसीबोका आउने अनुमान गरिएको छ। मासुको खुद्रा मूल्य प्रतिकिलो करिब ८५० देखि ८६० रुपैयाँ पुगेको छ। यता पोखरामा भने दसैँका लागि च्याङ्ग्रा बिक्री सुरु भएको छ।

व्यापारीहरूले डोल्पा, मुगु र मुस्ताङलगायत हिमाली जिल्लाबाट च्याङ्ग्रा ल्याएर बेच्न थालेका छन्। पोखरा महानगरपालिका–१ जौबारी याम्दीमा च्याङ्ग्रा किन्न ग्राहकको भीड लागेको छ।