रुसी आक्रमणपछि मध्य युक्रेनमा दुई लाखभन्दा बढी बिजुलीविहीन, जेलेन्स्की आज टर्की भ्रमणमा

रुसी आक्रमणपछि युक्रेनको मध्य भागको डिप्रोपेट्रोभ्स्क क्षेत्रमा दुई लाखभन्दा बढी मानिस अझै बिजुलीविहीन छन्। स्थानीय अधिकारीहरूले शुक्रबार यो जानकारी दिएका छन्। युक्रेनी वायुसेनाका अनुसार रुसले रातभर ब्यालेस्टिक मिसाइल र ड्रोन प्रहार गर्दै डिप्रोपेट्रोभ्स्कसहित धेरै क्षेत्रलाई निशाना बनाएको थियो।

यो आक्रमणपछि डिप्रो सहरमा बिजुली आपूर्ति व्यापक रूपमा अवरुद्ध भएको छ। युद्धभर रुसले युक्रेनको ऊर्जा पूर्वाधारलाई निशाना बनाउँदै आएको छ। रुसी रक्षा मन्त्रालयले भने आफ्नो हवाई रक्षा प्रणालीले रातभर रुसी भूभागमाथि एक हजारभन्दा बढी युक्रेनी ड्रोन खसालेको दाबी गरेको छ।

यसैबीच, राष्ट्रपति भोलोदिमिर जेलेन्स्की शनिबार टर्कीको राजकीय भ्रमणमा जाँदै हुनुहुन्छ। टर्की राष्ट्रपति कार्यालयका सञ्चार निर्देशक बुर्हानेत्तिन दुरानका अनुसार इस्तानबुलमा हुने भेटमा राष्ट्रपति रेसेप तैयप एर्दोगानसँग युद्ध, कालो सागरको सुरक्षा र द्विपक्षीय सहकार्यबारे छलफल हुनेछ। रुस र युक्रेनबीचको युद्ध अन्त्य गर्न टर्कीले वार्ताको प्रस्ताव गरेको छ।