क्युबामाथिको अमेरिकी प्रतिबन्ध हटाउन राष्ट्रसङ्घ महासभाको माग

संयुक्त राष्ट्रसङ्घ महासभाले क्युबामाथि अमेरिकाले लगाएको आर्थिक, व्यापारिक र वित्तीय प्रतिबन्ध हटाउन माग गर्दै फेरि प्रस्ताव पारित गरेको छ। महासभाले यस्तो प्रस्ताव लगातार ३४औँ वर्ष पारित गरेको हो। बुधबारको मतदानमा करिब १३० राष्ट्रले प्रस्तावको पक्षमा र करिब १७ राष्ट्रले विपक्षमा मत दिएका छन्।

करिब २५ राष्ट्र मतदानमा अनुपस्थित रहेका छन्। प्रतिबन्ध अन्तर्राष्ट्रिय कानूनविपरीत रहेको आलोचना बढिरहेका बेला यो प्रस्तावले अमेरिकामाथि दबाब थपेको छ। प्रस्तावमा सन् १९९६ को हेल्म्स–बर्टन ऐनजस्ता अमेरिकी कानूनले अरू देशको सार्वभौमिकता र व्यापारमा असर पारेको उल्लेख छ।

सदस्य राष्ट्रहरूले प्रतिबन्धका कारण क्युबाको समाज र अर्थतन्त्र गम्भीर रूपमा प्रभावित भएको भन्दै विरोध गरेका छन्। बहसका बेला अमेरिकी र क्युबाली प्रतिनिधिहरूबीच चर्काचर्की भएपछि बैठक केहीबेर रोकिएको थियो।