कांग्रेस: एकताबद्ध पार्टीको प्रतिबद्धता, इतर पक्षको कात्तिक १५ भित्र जिल्ला अधिवेशन

नेपाली कांग्रेसका नवनिर्वाचित सहमहामन्त्री अजयबाबु शिवाकोटीले विगतका कमजोरी सच्याउँदै पार्टीलाई बलियो र एकजुट बनाएर अघि बढाउने बताउनुभएको छ। रिपोर्टर्स क्लब नेपालले शुक्रबार काठमाडौँमा आयोजना गरेको साक्षात्कार कार्यक्रममा उहाँले १५औँ महाधिवेशनले गगन थापाको नेतृत्वलाई फेरि अनुमोदन गरेको बताउनुभएको छ। शिवाकोटीका अनुसार कांग्रेसले सडक आन्दोलनको सट्टा सरकारका काममाथि निरन्तर निगरानी गर्ने रचनात्मक प्रतिपक्षको बाटो रोजेको छ।

पार्टीले स्थानीय र प्रदेश निर्वाचनलाई केन्द्रमा राखेर जनतामाझ जाने योजना बनाएको उहाँले जानकारी दिनुभएको छ। सरकारले गरेका वाचा पूरा गराउन ६ महिनासम्म घरदैलो कार्यक्रम चलाउने तय भएको उहाँले उल्लेख गर्नुभएको छ। यता, कांग्रेसको इतर पक्षले कात्तिक १५ गतेभित्र सबै जिल्लाको अधिवेशन सक्ने तयारी गरेको छ।

उक्त पक्षले मंसिर २१ देखि २३ गतेसम्म छुट्टै १५औँ महाधिवेशन गर्ने घोषणा गरिसकेको छ। इतर पक्षको केन्द्रीय निर्वाचन समितिका संयोजक एगराज पोखरेलका अनुसार असोज १५ गतेदेखि सुरु भएको प्रक्रियामा करिब ४८० पालिका र ६ हजारभन्दा बढी वडामा अधिवेशन सकिएको छ। करिब २१ जिल्लामा पनि अधिवेशन सम्पन्न भएको उहाँले बताउनुभएको छ।

संस्थापन पक्षले भने झन्डै ३०० सदस्यीय केन्द्रीय कार्यसमिति चयन गरिसकेको छ।