नेकपाको दुई महिने राष्ट्रिय जागरण अभियान भोलिदेखि

नेपाली कम्युनिस्ट पार्टी, नेकपाले भोलि कात्तिक ७ गतेदेखि दुई महिने राष्ट्रिय जागरण अभियान सुरु गर्ने भएको छ। पार्टीका अनुसार यो अभियान मङ्सिर २५ गतेसम्म चल्नेछ। जनताले भोगिरहेका समस्या र उनीहरूका माग सङ्कलन गरी समाधानका लागि पहल गर्नु अभियानको मुख्य उद्देश्य हो।

अभियानअन्तर्गत केन्द्रमा प्रधानमन्त्री, प्रदेशमा मुख्यमन्त्री र जिल्लामा प्रमुख जिल्ला अधिकारीलाई मागपत्र तथा ज्ञापनपत्र बुझाउने कार्यक्रम छ। पार्टीले देशका विभिन्न स्थानमा जनभेला, अन्तरक्रिया, गोष्ठी र पत्रकार सम्मेलन आयोजना गर्ने तयारी गरेको छ। ती कार्यक्रममार्फत बढ्दो महँगी, बेरोजगारी, भ्रष्टाचार, कालोबजारी, असुरक्षा र जनजीविकाका समस्यामा सम्बन्धित निकायको ध्यान खिचिने पार्टीको भनाइ छ।

प्राकृतिक प्रकोपमा परेका नागरिकलाई उद्धार, राहत र क्षतिपूर्ति दिलाउन तथा उनीहरूको पुनःस्थापनाका लागि पनि पार्टीले पहल गर्नेछ। अभियानकै अवधिमा जनसेवा र जनचेतना जगाउने कार्यक्रम पनि सञ्चालन गरिने नेकपाले उल्लेख गरेको छ। अभियान चलाउने निर्णय असोज २३ गते बसेको पार्टीको केन्द्रीय संयोजन समितिको बैठकले गरेको थियो।