रास्वपा संघीयताविरोधी होइन: मनीष झा, साताव्यापी बेलायत भ्रमणमा जाँदै

राष्ट्रिय स्वतन्त्र पार्टी (रास्वपा) का सांसद मनिष झाले आफ्नो पार्टी संघीयताविरोधी नभएको बताउनुभएको छ। जनकपुरमा भएको एक कार्यक्रममा उहाँले रास्वपा संघीय संरचनालाई अझ कसिलो र प्रभावकारी बनाउन चाहने स्पष्ट पार्नुभएको छ। प्रदेशसभा र प्रदेश परिषद्को अवधारणा अघि बढाएर संघीयतालाई बलियो बनाइने उहाँको भनाइ छ।

संघीयताबारे थप व्याख्या आवश्यक नरहेको पनि उहाँले बताउनुभएको छ। गत निर्वाचनमा मधेसमा रास्वपाले धेरै मत पाएको उहाँले सम्झाउनुभएको छ। आगामी स्थानीय तहको निर्वाचनमा पनि एकजुट भई पार्टीको पक्षमा वातावरण बनाउन उहाँले आग्रह गर्नुभएको छ।

आफ्नैबीच झगडा र झुटा आरोप–प्रत्यारोप गरे कतै पुग्न नसकिने उहाँको भनाइ छ। मधेसी समुदायभित्रको यस्तो प्रवृत्ति अन्त्य हुनुपर्नेमा उहाँले जोड दिनुभएको छ। पढाइ, विचार र संस्कारमा टेकेको सभ्य राजनीति आवश्यक रहेको पनि उहाँले बताउनुभएको छ।

यसैबीच रास्वपाको विदेश विभाग प्रमुखसमेत रहनुभएका झा अक्टोबर ३० देखि नोभेम्बर ६ सम्म बेलायत भ्रमणमा जाँदै हुनुहुन्छ। रास्वपा प्रवास सम्पर्क विभाग बेलायतका सभापति पवन शर्माले भ्रमणको जानकारी दिनुभएको छ। झाले पनि भ्रमण पुष्टि गर्नुभएको छ।

शाखाका महासचिव कृष्ण लुइँटेलका अनुसार नोभेम्बर १ आइतबार पूर्वी लन्डनमा भेटघाट तथा संवाद कार्यक्रम हुनेछ। भ्रमणमा झाले बेलायतमा रहेका नेपाली समुदायका कार्यक्रममा भाग लिनुहुनेछ र नेपाली व्यवसायीसँग छलफल गर्नुहुनेछ। उहाँले बेलायती संसद् अवलोकन गर्ने र लन्डनस्थित नेपाली दूतावासको कार्यक्रममा सहभागी हुने अपेक्षा गरिएको छ।