बाढीपीडितका लागि देश–विदेशबाट सहयोग जारी: न्युयोर्कका मुस्ताङवासीदेखि लमजुङ उद्योग सङ्घसम्म

गत भदौ १० गते भोटेकोशी र त्रिशूली क्षेत्रमा आएको बाढीका पीडितका लागि देश र विदेशबाट सहयोग आउने क्रम जारी छ। अमेरिकाको न्युयोर्कमा बस्ने उपल्लो मुस्ताङवासीले करिब १ लाख ४ हजार अमेरिकी डलर, अर्थात् झन्डै १ करोड ६० लाख रुपैयाँ प्रधानमन्त्री दैवीप्रकोप उद्धार कोषमा पठाएका छन्। न्युयोर्कको वुडसाइडमा रहेको लो-न्यामशिप एसोसिएसन युएसए इंकमार्फत लोमान्थाङ र लो-घेकर दामोदरकुण्ड गाउँपालिकाका बासिन्दाले देशविदेशका शुभेच्छुकसँग मिलेर उक्त रकम जुटाएका हुन्।

यो संस्था सन् २०१४ मा स्थापना भएको हो। यता, लमजुङ उद्योग वाणिज्य संघले रसुवाका बाढी प्रभावित परिवारका लागि करिब २२ लाख रुपैयाँ बराबरको खाद्यान्न, लत्ताकपडा र दैनिक उपभोग्य सामग्री संकलन गरेको छ। संघका अध्यक्ष भरतकुमार श्रेष्ठको नेतृत्वमा राहत बोकेको टोली बुधबार रसुवातर्फ गएको छ।

संघका अनुसार बेसीशहर, सुन्दरबजार र उदिपुर इकाइबाट सामग्री जुटाइएको हो। नुवाकोट उद्योग वाणिज्य संघसँगको समन्वयमा राहत वितरण गरिने प्रथम उपाध्यक्ष विकास श्रेष्ठले बताउनुभएको छ। त्यस्तै, लक्ष्मी सनराइज क्यापिटल लिमिटेडले कम्पनी र कर्मचारीको योगदान मिलाएर करिब २१ लाख ५७ हजार रुपैयाँ सोही कोषमा जम्मा गरेको छ।

कम्पनीले यो सहयोग सामाजिक उत्तरदायित्वअन्तर्गत गरेको जनाएको छ।