भेडाच्याङ्ग्रा बेच्न मुगुबाट ३६ दिन पैदल हिँडेका किसान म्याग्दी आइपुगे, बजारको चिन्ता

दसैँका लागि भेडाच्याङ्ग्रा बेच्न मुगुबाट हिँडेका सञ्जय बिकसहित चार जना किसान ३६ दिनको कष्टकर पैदल यात्रापछि शुक्रबार साँझ म्याग्दीको गलेश्वर आइपुगेका छन्।

प्रतिकूल मौसम, हिमपात र सडक अवरुद्ध हुँदा दसैँका लागि भेडाच्याङ्ग्रा बिक्री गर्न आएका हिमाली किसान समस्यामा परेका छन्। मुगु र डोल्पाबाट भेडाच्याङ्ग्रा लिएर आएका किसानले समयमै बजार पुर्‍याउन ढिलाइ भएको बताएका छन्।

लामो पैदल यात्रा, हिमपात, बाढीपहिरो र सडक अवरोधले किसानको योजना प्रभावित भएको छ। बजारमा समयमै पुग्न नसक्दा बिक्रीको अवसर गुम्ने जोखिम बढेको छ।

ढुवानी तथा बाटोमा हुने खर्चले पनि किसानको आम्दानी प्रभावित हुने चिन्ता छ।