बेत्रावतीमा भोलिदेखि बेलीब्रिज सञ्चालनमा आउने, स्याफ्रुबेसीको पुल निर्माणले पनि गति लियो

नुवाकोटको बेत्रावतीमा निर्माणाधीन बेलीब्रिज भोलिदेखि सञ्चालनमा आउने भएको छ। पुल निर्माणको काम अन्तिम चरणमा पुगेको छ।

बाढीका कारण प्रभावित यातायात सञ्जाल पुनः सञ्चालन गर्ने प्रयासअन्तर्गत यो बेलीब्रिज निर्माण भइरहेको हो। पूर्वाधार विकास मन्त्रालयले गठन गरेको 'पुल/बेलीब्रिज निर्माण तथा पुनर्स्थापना कार्यदल' ले निर्माण कार्य अघि बढाएको हो।

कार्यदलका अनुसार बेत्रावतीको बेलीब्रिज निर्माण कार्य समयमै सम्पन्न हुने अवस्थामा पुगेको छ। पुल सञ्चालनमा आएपछि बाढीले प्रभावित उक्त क्षेत्रमा सवारी आवागमन फेरि सुरु हुने अपेक्षा गरिएको छ।

यसैबीच स्याफ्रुबेसीमा पनि पुल निर्माणको कामले गति लिएको छ। बाढीले क्षति पुर्‍याएका पुल तथा सडक संरचना पुनर्स्थापना गरी यातायात सञ्जाल सुचारु गर्ने काम भइरहेको छ।