एमाले स्थायी कमिटी बैठकका सात निर्णय: १३ जना केन्द्रीय सदस्य मनोनीत, मंसिर २६ मा वडा अधिवेशन

नेकपा एमालेको स्थायी कमिटी बैठकले केन्द्रीय कमिटीमा १३ जना सदस्य मनोनयन गर्नेसहित सात वटा निर्णय गरेको छ। बिहीबारदेखि ललितपुरको च्यासलस्थित पार्टी केन्द्रीय कार्यालयमा बसेको तीन दिने बैठक शनिबार सम्पन्न भएको हो।

पार्टी सचिव महेश बस्नेतका अनुसार केन्द्रीय कमिटीमा मनोनीत हुनेमा शृजना राई र पुष्पा केसीलगायत छन्। मनोनयनमा महिलातर्फ ६ जना र पुरुषतर्फ ६ जना समेटिएका छन्।

बैठकले पार्टीका वडास्तरीय कमिटीको अधिवेशन मंसिर २६ गते र गाउँपालिका तथा नगरपालिका तहका कमिटीको अधिवेशन पुस ४ गते सम्पन्न गर्ने निर्णय गरेको छ। आगामी मंसिरको पहिलो साता पार्टीको राष्ट्रिय भेला आयोजना गर्ने निर्णय पनि बैठकले गरेको छ।

बैठकपछि अध्यक्ष केपी शर्मा ओलीले महासचिव शंकर पोखरेलसँग आफ्नो सम्बन्धमा दरार आएको भन्ने सार्वजनिक चर्चा निराधार भएको बताए। स्थायी कमिटी सदस्य छविलाल विश्वकर्माले पनि पार्टी नेतृत्व र पदाधिकारीबीच कुनै असमझदारी नरहेको र विवादसम्बन्धी टिप्पणी प्रायोजित भएको दाबी गरे।