ज्यापू समाजको मानार्थ सदस्य बन्ने सांसद खरेलको इच्छा

राष्ट्रिय स्वतन्त्र पार्टीका सांसद जगदीश खरेलले ज्यापू समाजको मानार्थ सदस्य बन्न पाउने इच्छा व्यक्त गर्नुभएको छ। ललितपुरमा आयोजित समाजको औपचारिक कार्यक्रममा बोल्दै उहाँले आफूलाई ‘जगदीश खरेल नेवार’ का रूपमा चिनिन मन लागेको बताउनुभएको छ। समाजको विधान, नियम र परम्पराले अनुमति दिए मात्र सदस्य बनाउन उहाँले अध्यक्ष र पदाधिकारीसमक्ष प्रस्ताव राख्नुभएको हो।

सांसद खरेलले आफूलाई कुनै अधिकार नचाहिने र कर्तव्य निर्वाहका लागि मात्र सदस्यता चाहेको स्पष्ट पार्नुभएको छ। काम नगरे समाजले आफूलाई गाली गर्न पाउने अधिकार राखोस् भन्ने आफ्नो चाहना रहेको उहाँले बताउनुभएको छ। समाजको अध्यक्ष बन्ने कुनै चाहना नभएको पनि उहाँले उल्लेख गर्नुभएको छ।

नेवारी कला र संस्कृतिसँग आफ्नो पुरानो भावनात्मक नाता रहेको भन्दै उहाँले कृष्णलाल महर्जन, प्रेमबहादुर महर्जनलगायत स्थानीय अग्रजप्रति सम्मान व्यक्त गर्नुभएको छ। ज्यापू समाजका अग्रजहरूसँगको आफ्नो सम्बन्ध नयाँ नभएको पनि उहाँले बताउनुभएको छ। ललितपुरलाई आफ्नो कर्मभूमि भन्दै उहाँले त्यहाँको कला, संस्कृति र अमूर्त सम्पदा जोगाउन सक्दो पहल गर्ने बताउनुभएको छ।

ललितपुरको विकास र सम्पदा संरक्षणका लागि संसदमा सक्रिय भूमिका खेल्ने उहाँको भनाइ छ। आगामी हिउँदे अधिवेशनमा अमूर्त सम्पदासम्बन्धी विधेयक अघि बढाउने प्रतिबद्धता पनि उहाँले जनाउनुभएको छ। सम्पदा संरक्षणमा समुदायको सहभागिता अनिवार्य हुने सांसद खरेलको धारणा छ।