वैदेशिक रोजगारीको जीवन समेटिएको महेन्द्र महकको कथासङ्ग्रह 'खदामा' विमोचन

कथाकार महेन्द्र महकको पहिलो कथासङ्ग्रह ‘खदामा’ काठमाडौँमा सार्वजनिक गरिएको छ। वैदेशिक रोजगारीमा रहेका नेपाली श्रमिकको जीवन, पीडा र सङ्घर्ष समेटिएको यो कृति बेला पब्लिकेशनले प्रकाशन गरेको हो। विमोचन कार्यक्रममा समीक्षक नवीन विभाषले यसलाई श्रमजीवी वर्गको प्रतिनिधित्व गर्ने कथासङ्ग्रह भनी व्याख्या गर्नुभएको छ।

उहाँका अनुसार कथामा विदेश जानुपर्ने बाध्यता, महिला पात्रले भोग्ने उत्पीडन र त्यसबीचको आशा देखिन्छ। बहुभाषिक र पारलैङ्गिक पात्रमार्फत कृतिले नेपाली भाषालाई पनि समृद्ध बनाएको उहाँको भनाइ छ। समीक्षक विभूति भट्टराईले खाडी मुलुकमा काम गर्न जाने नेपाली महिलाको पीडालाई कृतिले प्रतिनिधित्व गरेको बताउनुभएको छ।

उहाँका अनुसार यी कथाले नेपाली युवामा प्रेरणा जगाउन सक्छन्। लेखक महकले अरब मुलुकमा काम गर्दा कार्यस्थल र गल्लीमा देखेका र भोगेका अनुभवलाई कथामा उतारेको बताउनुभएको छ। सल्यानको गाउँबाट सुरु भएको उहाँको श्रम यात्रा भारतको सिमला हुँदै संयुक्त अरब इमिरेट्ससम्म पुगेको थियो।

किशोर उमेरमै काममा लाग्नुभएका महकले परदेशमा कम तलबका श्रमिकले भोग्ने एक्लोपन र ससाना खुसी नजिकबाट देख्नुभएको थियो। नेपाल फर्केपछि लोकसेवा उत्तीर्ण गरी सरकारी सेवामा प्रवेश गर्नुभएका उहाँ हाल नेपाल सरकारको उपसचिव हुनुहुन्छ। प्रशासनिक जिम्मेवारीसँगै उहाँले साहित्य लेखनलाई निरन्तरता दिँदै आउनुभएको छ।