मैत्रीपूर्ण खेलमा ब्राजिलले भारतलाई ४–० ले हरायो

पाँच पटकको विश्वविजेता ब्राजिलले अन्तर्राष्ट्रिय मैत्रीपूर्ण फुटबल खेलमा भारतलाई ४–० गोलले पराजित गरेको छ। कोलकाताको साल्ट लेक स्टेडियममा शनिबार राति भएको खेल दुई देशका पुरुष राष्ट्रिय टोलीबीचको पहिलो सिनियर भिडन्त थियो। खेल हेर्न आउने दर्शकले रङ्गशालामा प्रवेश गर्नुअघि तीन तहको सुरक्षा जाँच पार गर्नुपरेको थियो।

२८औँ मिनेटमा एस्टेभाओ विलियमले काउन्टर आक्रमणबाट ब्राजिलको खाता खोलेका थिए। ४२औँ मिनेटमा भारतीय कप्तान तथा गोलरक्षक गुरप्रित सिंह सन्धुको कमजोर बचाउबाट पेड्रोले दोस्रो गोल थपेका थिए। दोस्रो हाफमा सामुएल लिनोले ५८औँ मिनेट र इन्जुरी समयमा गरी दुई गोल गरेका छन्।

दोस्रो हाफमा गुरप्रितको ठाउँमा प्रभसुखन गिल गोलपोस्टमा उत्रिएका थिए। ब्राजिलको कप्तानी डिफेन्डर मार्किन्होसले गरेका थिए भने भिनिसियस जुनियर पनि सुरुआती एघारमा थिए। नवौँ मिनेटमा भिनिसियसको प्रहार गुरप्रितले बचाएका थिए।

६७औँ मिनेटमा मनवीर सिंहको पासमा रायन विलियम्सले पेनाल्टी बक्सभित्र पाएको अवसर खेर गएको थियो। खेलअघिको फिफा वरीयतामा ब्राजिल छैटौँ र भारत १३८औँ स्थानमा थिए। भारतले यसअघि पानामासँग बराबरी खेलेको थियो।