टिकटकद्वारा त्रिविका पत्रकारिता विद्यार्थीलाई दुईदिने मास्टरक्लास

टिकटकले त्रिभुवन विश्वविद्यालयका पत्रकारिता विद्यार्थीका लागि डिजिटल कथावाचनसम्बन्धी दुईदिने मास्टरक्लास सञ्चालन गरेको छ। विश्वविद्यालयअन्तर्गतको केन्द्रीय पत्रकारिता तथा आमसञ्चार विभागसँग मिलेर शुक्रबार काठमाडौँमा आयोजित कार्यक्रममा स्नातक र स्नातकोत्तर तहका विद्यार्थी, प्राध्यापक, पत्रकार तथा डिजिटल क्रिएटर सहभागी भएका छन्। मोबाइल र सामाजिक सञ्जालका कारण बदलिँदो सञ्चार क्षेत्रका लागि विद्यार्थीलाई तयार पार्नु यसको उद्देश्य रहेको आयोजकले जनाएको छ।

टिकटकका विज्ञहरूले पत्रकारितामूलक सामग्री निर्माण, सुरक्षा र जिम्मेवार स्टोरीटेलिङबारे सत्र लिनुभएको छ। अनुभवी पत्रकारहरूले तीव्र परिवर्तनबीच विश्वसनीयता जोगाउने व्यावहारिक उपाय सुनाउनुभएको छ। त्रिविका उपकुलपति प्रा.डा.

भोला थापाले डिजिटल युगमा सूचना बनाउने र उपभोग गर्ने तरिका फेरिँदा पत्रकारिता शिक्षा पनि बदलिँदै गएको बताउनुभएको छ। उहाँका अनुसार विभागका धेरै विद्यार्थी अध्ययनसँगै सञ्चार क्षेत्रमा काम गरिरहेका छन् र उनीहरूसँग अनुभव बाँड्न अघि सरेकोमा उहाँले टिकटकलाई धन्यवाद दिनुभएको छ। टिकटककी मध्यपूर्व, अफ्रिका, दक्षिण तथा मध्य एसिया र पूर्वी युरोप क्षेत्रकी सञ्चार प्रमुख रोला अबु हसनले सटीकता, प्रमाणीकरण, जबाफदेहिता र जनहितलाई केन्द्रमा राखेर सामग्री बनाउन पत्रकारलाई सक्षम बनाउने लक्ष्य रहेको बताउनुभएको छ।

टिकटकका सरकारी सम्बन्ध तथा सार्वजनिक नीति प्रतिनिधि किरण चापागाईं र विभागका डा. श्रीराम पौडेलसहितको प्यानलमा एआई र नेपाली पत्रकारिताको बदलिँदो भूमिकाबारे पनि छलफल भएको छ।