दसैँ मनाएर उपत्यका फर्कनेको लर्को, प्रवेश नाकामा सवारी चाप

दसैँ मनाएर काठमाडौँ उपत्यका फर्कने यात्रु बढेसँगै उपत्यका छिर्ने मुख्य नाकामा सवारीको चाप बढेको छ। काठमाडौँ उपत्यका ट्राफिक प्रहरी कार्यालयका अनुसार नागढुङ्गा–कलङ्की, जडीबुटी–कोटेश्वर, तीनपिप्ले र भक्तपुरको जगाती खण्डमा सवारी बढी देखिएको छ। भट्टेडाँडा र दक्षिणकाली–फर्पिङ सडकमा पनि चाप थपिएको छ।

टीका र आशीर्वाद थापेर गाउँघरबाट फर्कनेहरू निजी र सार्वजनिक दुवै किसिमका सवारीमा राजधानी छिरिरहेका छन्। कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले आवागमन सहज बनाउन ट्राफिक प्रहरी सक्रिय रूपमा खटाइएको बताउनुभएको छ। प्रवक्ता नरेशराज सुवेदीका अनुसार फर्कनेको सङ्ख्या दिनहुँ बढ्दै गएकाले सडकमा निगरानी बढाइएको छ।

सवारी चाप मिलाउनु र सम्भावित दुर्घटना घटाउनु यसको उद्देश्य रहेको उहाँले जानकारी दिनुभएको छ। ट्राफिक प्रहरीले मुख्य नाकासँगै उपत्यकाभित्रका व्यस्त सडकमा पनि व्यवस्थापन कडा बनाएको छ। दसैँ बिदा सकिँदै जाँदा राजधानी फर्कनेको सङ्ख्या अझै बढ्ने अनुमान गरिएको छ।