हुम्लाको लिमीमा हिउँमा झन्डै एक महिना अड्किएका करिब २०० चौपाया उद्धार

हुम्लाको नाम्खा गाउँपालिका–६ लिमीमा भारी हिमपातपछि झन्डै एक महिनादेखि अलपत्र परेका याकसहित करिब २०० चौपायाको उद्धार गरिएको छ। लिमी उत्तरपश्चिमी नेपालको हिमालपारि पर्ने दुर्गम बस्ती हो र ती चौपाया त्यहाँका उच्च खर्कमा चराउन लगिएका थिए। गत असोजमा लगातार तीन दिन परेको भारी हिउँले खर्क ढाकिएपछि चौपाया कहाँ र कस्तो अवस्थामा छन् भन्ने पत्ता लगाउन र खोजी तथा उद्धार गर्न कठिन भएको थियो।

वडाध्यक्ष पाल्जोर तामाङका अनुसार उद्धार गरिएका चौपायामा करिब १०० याक, ५० घोडा र ५० वटा नाक तथा झोपा छन्। उहाँका अनुसार लामो समय सम्पर्कबाहिर रहेका चौपायालाई निङ खोला, साक्य खोला, गेउ खोला र लाप्चा क्षेत्रका खर्कबाट ठूलो प्रयासपछि फर्काइएको हो।