आज हिमाल–पहाडमा हल्का वर्षा र हिमपात, साताको अन्त्यमा न्यूनचापले वर्षा–हिमपात र चिसो, धान भित्र्याउन किसानको चटारो

मौसम पूर्वानुमान महाशाखाका अनुसार आज र भोलि हिमाली तथा पहाडी भूभागका केही ठाउँमा हल्का वर्षा र हिमपात हुन सक्छ। पश्चिमी वायुको आंशिक प्रभावका कारण आज कोशी, गण्डकी र कर्णालीका हिमाली क्षेत्र तथा कोशी, बागमती र गण्डकीका पहाडी क्षेत्रका एक–दुई स्थानमा यस्तो सम्भावना रहेको महाशाखाले जनाएको छ। तराईमा मौसम सफा रहे पनि केही ठाउँमा बिहानपख हुस्सु र कुहिरो लाग्ने अनुमान छ।

साताको अन्त्यतिर भने बङ्गालको खाडीमा बन्ने न्यूनचापीय प्रणालीले मौसम सक्रिय बनाउने देखिएको छ। मौसमविद् राजन महर्जनका अनुसार कोशी, बागमती र गण्डकीका हिमाली भेगमा मध्यमदेखि भारी, र एक–दुई ठाउँमा धेरै भारी हिमपात हुन सक्छ। पहाडी क्षेत्रमा मध्यम वर्षा हुन सक्छ भने तराईमा साताको अन्त्यमा मात्र वर्षाको सम्भावना छ, जसमा बागमती, गण्डकी र लुम्बिनीका केही ठाउँमा भारी वर्षा हुन सक्छ।

तापक्रम घटेर चिसो बढ्ने पूर्वानुमान पनि गरिएको छ। सामाजिक सञ्जालमा फैलिएका हल्लाबाट आत्तिनुपर्ने अवस्था नरहेको महर्जनले स्पष्ट पार्नुभएको छ। मौसमविद् विनोद पोखरेलले पाकेको धान वर्षा सुरु हुनुअघि नै काटेर, सुकाएर भित्र्याउन किसानलाई सुझाव दिनुभएको छ।

उच्च हिमाली क्षेत्रमा पदयात्रा गर्नेलाई पनि उहाँले नियमित मौसम सूचना हेर्न आग्रह गर्नुभएको छ। दशैं सकिएसँगै दाङका किसान वर्षाको चिन्ताले धान भित्र्याउने काममा व्यस्त छन्।