नीतिगत सुधार र व्यवसायमैत्री वातावरणका लागि महासङ्घको पूर्वाधारमन्त्रीसँग माग

नेपाल उद्योग वाणिज्य महासङ्घले लगानीमैत्री वातावरण बनाउन र व्यवसायमा देखिएका नीतिगत अवरोध हटाउन सरकारसँग माग गरेको छ। महासङ्घका अध्यक्ष अञ्जन श्रेष्ठ नेतृत्वको टोलीले बिहीबार सिंहदरबारस्थित पूर्वाधार विकास मन्त्रालयमा मन्त्री सुनिल लम्साललाई भेटेर निजी क्षेत्रका समस्या र समाधानका उपायबारे छलफल गरेको हो। भेटमा अध्यक्ष श्रेष्ठले लगानी विस्तारका बाधा, प्रशासनिक झन्झट र व्यवसाय सञ्चालनका व्यावहारिक कठिनाइ समाधानमा सरकारको प्राथमिकता हुनुपर्ने बताउनुभएको छ।

उहाँले निर्यात प्रवर्द्धन, पूर्वाधार विकासमा तीव्रता र निजी क्षेत्रको मनोबल उकास्ने कदम पनि माग गर्नुभएको छ। हालैको बाढीपहिरोले प्रभावित उद्योग, आपूर्ति प्रणाली र पूर्वाधार छिटो पुनःस्थापना गरी आर्थिक गतिविधि सामान्य बनाउन सहजीकरण चाहिने महासङ्घको भनाइ छ। सरकारलाई सबैको अभिभावक भन्दै अध्यक्ष श्रेष्ठले निजी क्षेत्र उत्पादन, निर्यात र रोजगारी बढाउन तयार रहेको र त्यसका लागि दुवै पक्षबीच प्रभावकारी सहकार्य चाहिने बताउनुभएको छ।

जवाफमा मन्त्री लम्सालले आर्थिक विकास, समृद्धि र व्यवसायमैत्री वातावरणका लागि सरकारले नीतिगत सुधार गरिरहेको बताउनुभएको छ। निजी क्षेत्रका समस्या र आवश्यक सुधारका विषय सरकारलाई प्रस्टसँग बताउन उहाँले आग्रह गर्नुभएको छ।