पेट्रोलियम पदार्थको मूल्य यथावत्, आयल निगमलाई पाक्षिक घाटा

नेपाल आयल निगमले पेट्रोल, डिजेल र मट्टितेलको खुद्रा बिक्री मूल्य साबिककै दरमा कायम राख्ने निर्णय गरेको छ। निगम सञ्चालक समितिको बिहीबार बसेको बैठकले यो निर्णय गरेको हो। इन्डियन आयल कर्पोरेसनले असोज २९ गते निगमलाई नयाँ खरिद मूल्य पठाएको थियो।

स्वचालित मूल्य प्रणालीअनुसार बिक्री मूल्य समायोजन गर्नुपर्ने अवस्था भए पनि नजिकिँदो चाडपर्वमा उपभोक्तामाथि भार नपरोस् भनेर मूल्य नबढाइएको निगमले जनाएको छ। निगमका अनुसार मूल्य नबढाउँदा उसलाई प्रत्येक १५ दिनमा करिब ३ अर्ब ४५ करोड रुपैयाँ घाटा हुने प्रक्षेपण गरिएको छ। अन्तर्राष्ट्रिय बजारमा कच्चा तेलको मूल्यमा उतारचढाव भइरहेका बेला यो निर्णय आएको हो।

निगमले देशभर पहिलो, दोस्रो र तेस्रो वर्गमा छुट्याएर फरक खुद्रा मूल्य लागू गर्दै आएको छ। निगमले यो निर्णयबारे बिहीबार प्रेस विज्ञप्ति जारी गरेको छ।