सेयर बजारमा संस्थागत लगानीकर्ता भित्र्याउन धितोपत्र बोर्डको नीतिको मस्यौदा

नेपाल धितोपत्र बोर्डले संस्थागत लगानीकर्ता नीति, २०८३ को मस्यौदा बिहीबार सार्वजनिक गर्दै सरोकारवालासँग सुझाव मागेको छ। व्यक्तिगत लगानीकर्ताको बाहुल्य रहेको सेयर बजारमा ठूलो र दीर्घकालीन पुँजी भएका संस्थालाई व्यवस्थित रूपमा भित्र्याउने बोर्डको उद्देश्य छ। अर्थमन्त्री डा.

स्वर्णिम वाग्लेले भदौ २९ गते जारी गरेको पुँजी बजार सुदृढीकरण तथा पुनरुत्थान कार्ययोजनाअनुसार यो नीति ल्याउन लागिएको हो। मस्यौदाले संस्थागत लगानीकर्तालाई पाँच वर्गमा बाँड्ने प्रस्ताव गरेको छ। कर्मचारी सञ्चय कोष, नागरिक लगानी कोष, सामाजिक सुरक्षा कोष, बीमा कम्पनी, बैंक तथा वित्तीय संस्था र सामूहिक लगानी कोषलाई पुँजी बजारमा व्यवस्थित रूपमा सहभागी गराउने प्रस्ताव छ।

प्रारम्भिक प्रस्तावअनुसार संस्थागत लगानीकर्ताले कुनै एउटा सूचीकृत कम्पनीमा आफ्नो कुल लगानी सम्पत्तिको करिब ३ देखि ५ प्रतिशतभन्दा बढी लगाउन पाउने छैनन्। सेयर लगानी एउटै क्षेत्रमा थुप्रिन नदिन कुल इक्विटी लगानीको करिब २० देखि २५ प्रतिशतसम्म मात्र एउटा क्षेत्रमा लगाउन सकिने सीमा पनि प्रस्ताव गरिएको छ। सरकारी धितोपत्र, बैंक मुद्दती निक्षेप, ऋणपत्र, सूचीकृत धितोपत्र र सामूहिक लगानी कोषमा सम्पत्ति बाँडफाँटको सीमा तोक्ने प्रस्ताव पनि मस्यौदामा छ।

लगानीकर्ताको दर्ता, सुशासन, जोखिम व्यवस्थापन र नियामकीय अनुगमनसम्बन्धी व्यवस्था पनि यसमा समेटिएका छन्। अन्तिम सीमा भने सम्बन्धित नियामकले तोकेको सीमाका आधारमा निर्धारण हुनेछ।