१२ वर्ष ढिला भएको चीन–उत्तर कोरिया जोड्ने यालु नदी पुल सञ्चालनमा

चीन र उत्तर कोरियालाई जोड्ने नयाँ यालु नदी पुल तोकिएको समयभन्दा करिब १२ वर्ष ढिलो गरी बिहीबार सञ्चालनमा आएको छ। करिब तीन किलोमिटर लामो र चार लेनको यो पुलले चीनको डान्दोङ सहर र उत्तर कोरियाको सिनुइजुलाई जोडेको छ। उद्घाटन कार्यक्रममा दुवै देशका प्रधानमन्त्रीले भिडियोमार्फत सन्देश दिनुभएको छ।

चिनियाँ प्रधानमन्त्री ली छ्याङले पुललाई दुई देशबीचको परम्परागत मित्रताको चिनो भन्दै सीमा क्षेत्रमा सहकार्य बढ्ने अपेक्षा व्यक्त गर्नुभएको छ। पुल सन् २०१४ मै खोल्ने योजना थियो, तर उत्तर कोरियातर्फको निर्माण पूरा नहुँदा काम रोकिएको थियो। हालसम्म दुई देशको आधिकारिक व्यापारको ७० प्रतिशतभन्दा बढी हिस्सा दशकौँ पुरानो पुलबाट हुँदै आएको छ।

उक्त पुलमा सवारी साधन एकपटकमा एकतर्फ मात्र चल्न सक्छन्। नयाँ पुलले पुरानो संरचनामाथिको चाप घटाउने र दुई देशबीच व्यापार, यातायात तथा आर्थिक सहकार्य बढाउने अपेक्षा गरिएको छ।