झरीमा भिज्दै बागलुङ कालिकाको दर्शनमा भक्तजन

लगातार वर्षा भइरहे पनि शनिबार बिहानैदेखि बागलुङ कालिका मन्दिरमा भक्तजनको आवतजावत रोकिएको छैन। बागलुङको प्रसिद्ध धार्मिकस्थल कालिका मन्दिरमा पर्वत, म्याग्दी, कास्की र काठमाडौँलगायत ठाउँबाट भक्तजन दर्शन र पूजाआजाका लागि पुगेका छन्। शनिबार सामान्यतया मन्दिरमा भक्तजनको भीड बढी हुने गरे पनि आज झरीका कारण चाप तुलनात्मक रूपमा कम छ।

बाढी र पहिरोले विभिन्न स्थानमा सडक अवरुद्ध हुँदा तथा प्रतिकूल मौसमका कारण भक्तजनको सङ्ख्या घटेको मन्दिर व्यवस्थापन समितिले जनाएको छ। चैते दसैँ र बडा दसैँमा यस मन्दिरमा विशेष पूजा गरिन्छ। पछिल्लो समय अन्य दिनमा पनि भक्तजन दर्शनका लागि आउन थालेका छन्।

यस मन्दिरमा पूजा गरे इच्छा पूरा हुने जनविश्वास छ। जल तथा मौसम विज्ञान विभागका अनुसार आज गण्डकी प्रदेशका हिमाली र पहाडी भू-भागका अधिकांश स्थानमा मेघगर्जन र चट्याङसहित मध्यमसम्मको वर्षा हुने सम्भावना छ। प्रदेशका थोरै स्थानमा भारीदेखि धेरै भारी वर्षा हुनसक्ने विभागले जनाएको छ।

गण्डकीकै पोखरामा आज मेघगर्जनसहित भारी वर्षाको सम्भावना १०० प्रतिशत रहेको विभागको पूर्वानुमान छ। गण्डकी प्रदेशको पहाडी भू-भागका केही स्थानमा हावाहुरी चल्न सक्ने पनि विभागले उल्लेख गरेको छ। भोलि पनि गण्डकीमा अधिकांश बादल लाग्ने र थोरै स्थानमा भारीदेखि धेरै भारी वर्षाको सम्भावना छ।