इन्द्रजात्राको चौथो दिन मरुहिटीमा सामूहिक कुमारी पूजा

इन्द्रजात्राको चौथो दिन शनिबार काठमाडौंको मरुहिटीमा सामूहिक कुमारी पूजा गरिएको छ। पूजामा सहभागी हुन उल्लेख्य सङ्ख्यामा नेवार परिवार मरुहिटी पुगेका थिए। उनीहरूले कुमारीको पहिरनमा सिँगारिएका आफ्ना साना छोरीहरूलाई पूजाका लागि अगाडि सारेका थिए।

ती बालिकालाई कुमारी मानेर पूजा गरिएको थियो। इन्द्रजात्रा सुरु भएको सङ्केत दिने योःसी अर्थात् लिङ्गो ठड्याइएको भोलिपल्ट कुमारी पूजा गर्ने परम्परा छ। सोही परम्पराअनुसार योःसी ठड्याइएको अर्को दिन काठमाडौंकै वसन्तपुर दरबार क्षेत्रमा पनि सामूहिक कुमारी पूजा गरिएको थियो।

इन्द्रजात्रासँगै यस वर्षका ठूला चाडपर्व पनि नजिकिँदै गएका छन्। यसैबीच जल तथा मौसम विज्ञान विभागले आज काठमाडौंमा मेघगर्जनसहित मध्यम वर्षाको ६० प्रतिशत सम्भावना रहेको जनाएको छ। विभागका अनुसार काठमाडौंको तापक्रम १९ देखि २१ डिग्री सेल्सियसको हाराहारीमा रहनेछ।

बागमती प्रदेशका हिमाली र पहाडी भू-भागका धेरै स्थानमा मेघगर्जन र चट्याङसहित मध्यमसम्मको वर्षा हुने पूर्वानुमान छ। प्रदेशका एक-दुई स्थानमा भारी वर्षा पनि हुनसक्ने विभागले जनाएको छ। आज बागमती प्रदेशको तराई र पहाडी भू-भागका केही स्थानमा हावाहुरी चल्न सक्ने विभागको भनाइ छ।

भोलि बागमती प्रदेशमा अधिकांश बादल लाग्नुका साथै तराई भू-भागका अधिकांश स्थानमा मेघगर्जनसहित मध्यम वर्षाको सम्भावना छ।