दसैँ–तिहारको यात्रामा मनपरी रोक्न संसदीय उपसमिति गठन

दसैँ, तिहार र छठमा सार्वजनिक यातायातमा हुने मनपरी रोक्न प्रतिनिधि सभाको पूर्वाधार विकास समितिले विशेष उपसमिति गठन गरेको छ। नियमावली, २०८३ को नियम १८५ अनुसार समितिको बैठकले यो निर्णय गरेको हो। उपसमितिको संयोजकमा धनेन्द्र कार्की तोकिनुभएको छ।

सदस्यमा आशा झा, पूर्ण प्रसाद लिम्बु र मञ्जु भुषाल हुनुहुन्छ भने थप एक सदस्य नियुक्त गरिने जनाइएको छ। उपसमितिले चाडपर्वमा हुने भीडभाड, तोकिएभन्दा बढी भाडा असुली र टिकट बिक्रीका अनियमितताबारे अध्ययन गर्नेछ। अग्रिम टिकट बुकिङको अवस्था र निर्धारित भाडादर लागु भए–नभएको अनुगमन उसको प्राथमिकतामा छ।

यात्रुको चापअनुसार सवारीसाधनको उपलब्धता र रुट व्यवस्थापनबारे पनि उपसमितिले नीतिगत तथा व्यावहारिक सुझाव दिनेछ। सडक सुरक्षातर्फ क्षमताभन्दा बढी यात्रु बोक्ने, तीव्र गति र मादक पदार्थ सेवन गरी सवारी चलाउने प्रवृत्तिको नियन्त्रण अवस्था पनि हेरिनेछ। लामो दूरीका सवारीमा चालक व्यवस्थापन र चालकको सुरक्षाबारे पनि अध्ययन हुनेछ।

प्रमुख राजमार्गमा पहिरो, मर्मतसम्भार, निर्माणाधीन सडक र सम्भावित जामको स्थलगत अनुगमन गरी उपाय सुझाइनेछ। यसका लागि यातायात व्यवस्था विभाग, ट्राफिक प्रहरी, जिल्ला प्रशासन कार्यालय, स्थानीय तह र यातायात व्यवसायीसँग समन्वय गरिनेछ। काम थालेको तीन महिनाभित्र उपसमितिले अध्ययन र अनुगमनसहितको सुझाव प्रतिवेदन मूल समितिमा पेस गर्नुपर्नेछ।