इन्द्रजात्रा: २४ वर्षपछि पञ्जरां दागिं, भक्तपुर र थिमिमा परम्परागत जात्रा

इन्द्रजात्राका अवसरमा काठमाडौँमा यसपालि २४ वर्षपछि पञ्जरां दागिं निकालिएको छ। नेवाः बौद्ध परम्परामा नरां पञ्जरां अर्थात् नवदान सम्पन्न गर्ने व्यक्तिलाई इन्द्र समान मानेर दागिंका रूपमा सहभागी गराइन्छ। यस वर्ष चमतिका पूर्णकाजी डंगोलले नरां पञ्जरां सम्पन्न गर्नुभएको छ।

दानमध्ये सम्यक महादानलाई सबैभन्दा ठूलो मानिन्छ भने त्यसपछिको महत्त्वपूर्ण दान नरां पञ्जरांलाई मानिन्छ। बौद्धविद्वान् प्राडा नरेशमान बज्राचार्यका अनुसार दागिंको रातो मुखौटालाई इन्द्रको स्वरूप मानिन्छ। भक्तपुरमा भने इन्द्र दह अर्थात् सिद्धपोखरीमा लागेको मेला इन्द्रको मूर्तिलाई खौमास्थित इन्द्रायणी देवगृहमा भित्र्याएपछि सम्पन्न भएको छ।

भाद्र शुक्ल पूर्णिमाका दिन दर्शनार्थीले दहमा स्नान गरी इन्द्रको पूजा गरेका थिए। इतिहासविद् प्राडा पुरुषोत्तमलोचन श्रेष्ठका अनुसार मूर्तिलाई खटमा राखी नगर परिक्रमा गराइएको थियो। मध्यपुरथिमिमा बालकुमारीका ३९ वर्षीय वीरेन्द्रभक्त गजू श्रेष्ठले पाँचौँ पटक जिब्रो छेडेर जात्रा गर्नुभएको छ।

कर्मी नाइके बाबुकाजी श्रेष्ठले फलामको सियोले जिब्रो छेडेपछि उहाँ महाद्वीप बोकेर खाली खुट्टा टोलटोल घुम्नुभएको हो। उहाँले यसअघि २०७४, २०७९, २०८१ र २०८२ सालमा पनि जिब्रो छेडाउनुभएको थियो। करिब ३५० वर्ष पुरानो मानिने यो जात्रा आर्थिक अभावले बीचबीचमा रोकिँदै आएको थियो।

जात्रामा करिब छ लाख रुपैयाँभन्दा बढी खर्च हुन्छ, जसमा बागमती प्रदेश सरकार र नगरपालिकाको सहयोगभन्दा बढी रकम स्थानीयले बेहोर्दै आएका छन्।