साउदी अरबमाथि हुथी आक्रमण तीव्र, ड्रोन र क्षेप्यास्त्र रोकिएको दाबी

यमनका हुथी विद्रोहीले साउदी अरबमाथि आक्रमण तीव्र पारेका छन्। साउदी नेतृत्वको गठबन्धनका अनुसार शनिबार राजधानी रियादतर्फ प्रहार गरिएका दुई ड्रोन हवाई प्रतिरक्षा प्रणालीले नष्ट गरेको छ। दक्षिणपश्चिमी सहर खमिस मुशैततर्फ छोडिएका दुई ब्यालेस्टिक क्षेप्यास्त्र पनि रोकिएको गठबन्धनले जनाएको छ।

उक्त सहरमा एउटा प्रमुख हवाई सैनिक अड्डा छ। इरान समर्थित हुथी समूहका आक्रमण गत जुलाईदेखि लगातार बढ्दै गएका छन्। संयुक्त राष्ट्रसंघ सुरक्षा परिषद्ले यसअघि नै यी आक्रमणको निन्दा गरिसकेको छ।

लामो युद्धविराम टुटेपछि यमनको द्वन्द्व मध्यपूर्वको फराकिलो युद्धसँग जोडिन पुगेको छ। हुथीले तेल बोक्ने पानीजहाजमा आक्रमण गरेको र लाल सागर तटमा नियन्त्रण फैलाएको बताइएको छ, जसको असर ऊर्जा बजारमा परेको छ। हुथी राजनीतिक ब्युरोका सदस्य हेजाम अल-असदले हालको अभियान पूर्ण युद्धका लागि सानो अभ्यास मात्र भएको बताउनुभएको छ।

खाडी सहयोग परिषद्का महासचिव जासेम मोहम्मद अल्बुदाइवीले यी आक्रमणलाई साउदी सार्वभौमसत्ताको गम्भीर उल्लङ्घन भन्दै अन्तर्राष्ट्रिय समुदायलाई कडा कदम चाल्न आग्रह गर्नुभएको छ। यमनको शासकीय निकायका प्रमुख रशाद अल-अलिमीले शुक्रबार देशभर आम परिचालनको आह्वान गर्नुभएको थियो। संयुक्त राष्ट्रसंघका अनुसार अगस्टयता यमनमा करिब एक लाख ३८ हजार मानिस विस्थापित भएका छन्, जसमध्ये झन्डै ७० हजार बालबालिका छन्।